سعودی عرب نے سات دن میں 15 ہزار افراد کو پکڑ لیا — پاکستانیوں کے لیے اہم خبر

ریاض — سعودی عرب کی وزارت داخلہ نے اعلان کیا ہے کہ ملک گیر سیکیورٹی مہم کے دوران ایک ہفتے میں 14 ہزار 970 افراد کو اقامہ، لیبر اور سرحدی قوانین کی خلاف ورزی پر گرفتار کیا گیا ہے۔
گرفتار افراد میں 7 ہزار 437 اقامہ قوانین کی خلاف ورزی، 3 ہزار 991 سرحدی سیکیورٹی قوانین کی خلاف ورزی اور 3 ہزار 542 لیبر قوانین کی خلاف ورزی پر حراست میں لیے گئے۔ اس کے علاوہ 1 ہزار 626 افراد غیر قانونی طریقے سے سعودی عرب داخل ہونے کی کوشش کے دوران پکڑے گئے جن میں 62 فیصد ایتھوپیا اور 37 فیصد یمنی شہری تھے۔ 33 افراد غیر قانونی طریقے سے ملک چھوڑنے کی کوشش میں گرفتار کیے گئے جبکہ 18 افراد غیر قانونی مقیم افراد کو پناہ دینے، روزگار فراہم کرنے اور نقل و حمل کرانے کے جرم میں گرفتار ہوئے۔
ابھی تک 30 ہزار 546 افراد قانونی کارروائی کے مراحل میں ہیں جن میں 28 ہزار 557 مرد اور 1 ہزار 989 خواتین شامل ہیں۔ 13 ہزار 251 افراد کو پہلے ہی ملک بدر کیا جا چکا ہے۔
سعودی وزارت داخلہ نے خبردار کیا ہے کہ جو بھی شخص غیر قانونی طور پر کسی کو ملک میں داخل کرانے، پناہ دینے یا روزگار دینے میں ملوث پایا گیا اسے 15 سال قید، 10 لاکھ ریال جرمانہ اور استعمال کی گئی گاڑیوں اور جائیداد کی ضبطی کی سزا ہو سکتی ہے۔
پاکستان سے تعلق رکھنے والے لاکھوں افراد سعودی عرب میں روزگار سے وابستہ ہیں — انہیں سختی سے تاکید کی جاتی ہے کہ اپنے اقامے، ویزے اور روزگار کی دستاویزات مکمل اور تازہ رکھیں۔