کارگل جنگ میں بھارت کو کس نے سہارا دیا؟ 27 سال بعد بڑا انکشاف سامنے آ گیا

نئی دہلی: پاکستان اور انڈیا کے درمیان 1999 کی کارگل جنگ کے 27 سال بعد ایک اہم انکشاف سامنے آیا ہے۔ اسرائیلی فضائیہ کے دو سابق افسران نے دعویٰ کیا ہے کہ کارگل جنگ کے دوران اسرائیل نے خاموشی سے انڈیا کو جدید دفاعی سازوسامان اور تکنیکی معاونت فراہم کی، جس سے انڈین فضائیہ کی جنگی صلاحیت میں نمایاں اضافہ ہوا۔
بھارتی میڈیا کو دیے گئے ایک انٹرویو میں اسرائیلی فضائیہ کے سابق افسران نے بتایا کہ اسرائیلی دفاعی کمپنی رافیل ایڈوانسڈ ڈیفنس سسٹمز اور انڈیا کے درمیان 1996 میں ایک دفاعی معاہدہ طے پایا تھا، جس کے تحت انڈین فضائیہ کے میراج 2000 لڑاکا طیاروں پر جدید لائٹننگ ٹارگٹنگ پوڈ نصب کیے جا رہے تھے۔
سابق اسرائیلی حکام کے مطابق مارچ 1999 تک اس منصوبے کے ابتدائی تجربات مکمل ہو چکے تھے، تاہم مئی میں کارگل جنگ شروع ہونے کے بعد صورتحال یکسر بدل گئی۔ ان کا کہنا تھا کہ انڈیا کی جانب سے ہنگامی رابطہ کیے جانے پر اسرائیلی انجینیئرز اور ماہرین کی ایک خصوصی ٹیم فوری طور پر انڈیا روانہ ہوئی، جہاں انہوں نے جنگی حالات میں جدید نظام کو فعال بنانے کے لیے دن رات کام کیا۔
انہوں نے بتایا کہ سب سے بڑا تکنیکی چیلنج اسرائیلی ساختہ ٹارگٹنگ پوڈ، فرانسیسی ساختہ میراج 2000 طیاروں اور امریکی ساختہ لیزر گائیڈڈ بموں کو ایک دوسرے کے ساتھ مکمل طور پر ہم آہنگ کرنا تھا تاکہ انڈین فضائیہ پہاڑی علاقوں میں اہداف کو زیادہ درستگی سے نشانہ بنا سکے۔
اسرائیلی سابق افسران کا کہنا تھا کہ اس منصوبے پر کئی برس تک کام جاری رہا اور متعدد تکنیکی مسائل کو حل کرنے کے بعد یہ نظام کارگل جنگ کے دوران مؤثر انداز میں استعمال کیا گیا۔
کارگل جنگ مئی سے جولائی 1999 تک پاکستان اور انڈیا کے درمیان لڑی گئی تھی۔ اس دوران دونوں ممالک کے سیکڑوں فوجی ہلاک اور ہزاروں زخمی ہوئے، جبکہ لائن آف کنٹرول کے دونوں جانب شہری آبادی کو بھی جانی اور مالی نقصان اٹھانا پڑا۔ انڈیا ہر سال 26 جولائی کو کارگل وجے دیوس مناتا ہے، جبکہ پاکستان کا مؤقف اس جنگ کے حوالے سے مختلف رہا ہے۔
رپورٹ میں یہ بھی کہا گیا ہے کہ انڈیا اور اسرائیل کے درمیان دفاعی تعاون بعد کے برسوں میں مزید مضبوط ہوا۔ 2025 میں پاکستان اور انڈیا کے درمیان کشیدگی کے دوران بھی پاکستان نے دعویٰ کیا تھا کہ انڈیا نے اسرائیلی ساختہ ہیروپ ڈرونز استعمال کیے تھے، تاہم انڈیا نے اس حوالے سے تفصیلی سرکاری مؤقف جاری نہیں کیا تھا۔
دفاعی امور کے ماہرین کے مطابق حالیہ انکشافات سے واضح ہوتا ہے کہ کارگل جنگ کے دوران انڈیا اور اسرائیل کے درمیان دفاعی تعاون اس وقت عام تصور سے کہیں زیادہ گہرا تھا، جس کی تفصیلات اب پہلی مرتبہ سابق اسرائیلی فوجی حکام کی جانب سے منظرِ عام پر لائی گئی ہیں۔